Mustafa Kamal Ne Beti Ko Cervical Cancer Se Bachao Ki Vaccine Lagwa Di

Islamabad: Wafaqi Wazir-e-Sehat Mustafa Kamal ne apni beti ko Cervical Cancer se bachao ki vaccine lagwa di aur kaha ke Allah ki raza ke liye beti ko samne laya hoon taake propaganda khatam ho. Tafseelaat ke mutabiq, National Anti-Cervical Cancer Vaccination campaign ke douran Mustafa Kamal ne apni sahibzadi Raja Kamal ko protective vaccine lagwayi. Media se guftagu karte hue unhon ne kaha ke vaccine ke hawale se ghalat aur gumrah kon propaganda kiya ja raha hai. Isi wajah se main apni beti ko laya hoon taake awaam ko yeh paigham diya ja sake ke ye vaccine safe hai aur har larki ko lagni chahiye. Wazir-e-Sehat ka kehna tha ke Pakistan duniya ka 191wa mulk hai jahan yeh vaccine di ja rahi hai. Is se pehle bohot se Islamic countries mein bhi yeh vaccine successfully use ho rahi hai. Unhon ne bataya ke duniya bhar mein 2006 se Cervical Cancer vaccine dastiyab hai aur lakhon zindagiyan is ke zariye mehfooz banai ja chuki hain. Mustafa Kamal ka kehna tha ke Pakistan mein is waqt 25 hazaar se zyada khawateen Cervical Cancer se mutasir hain. Agar afwaahon ki wajah se ek bhi larki vaccine se mehroom reh gayi aur us ki jaan gayi to ye bohot bara nuqsan hoga. Unhon ne kaha: “Yeh mere liye aasan nahi tha ke main apni beti ko camera par la kar vaccine lagwau, lekin main ne yeh qadam Allah ki raza aur apni qaum ki betiyon ki hifazat ke liye uthaya hai.” Mustafa Kamal ne ye bhi kaha ke mojooda nizam ke tehat mulk bhar mein har mareez ka ilaj mumkin nahi. Sarkari aur private hospitals mil kar bhi complete treatment facilities provide nahi kar sakte, is liye zaroori hai ke log prevention par focus karein. Unhon ne kaha: “Agar hum pehle hi preventive vaccines lagwa lein to bemari lagegi hi nahi. Warna har gali mein hospital bana dene ke bawajood patients ko sambhalna mushkil ho jaye ga.” Akhir mein Wazir-e-Sehat ne awaam se appeal ki ke propaganda ka shikar na hon aur apni betiyon ko national cervical cancer vaccination campaign ke douran zaroor vaccine lagwaen.